Swart April 2021
Is poësie nog moontlik
- vra Adorno -
na Auschwitz?
Die argiewe en dokumente
in my tuisbiblioteek
verklap 'n beheptheid
met woorde sinne
om sin te maak
van myself én ander se
woorde sonder omhaal
of afhaal "April
is the cruelest month"
onthou ek Eliot
se gevleuelde woorde
in 'n tyd toe vuur
'n biblioteek
ontbrand uitbrand afbrand
geen mense nou dood
net boeke opskryfsels
vertalings transkripsies
bleek bleker Bleek Lloyd
C. Louis Leipoldt
se al-die-veld-is-vrolik
in die leeskamer dalk uitgewis?
© Joan Hambidge
