S.J.A. de Villiers & Eunice van der
Berg. Klein kook en Geniet. Human
& Rousseau, 2002. ISBN 0 7081 4527 7.
Resensent: Joan Hambidge
Iemand moet die volgende fenomeen probeer
verklaar: waarom is daar tans soveel kosrubrieke, kosboeke, resepteboeke en
kosprogramme beskikbaar? As’t ware aan die kook? En dan sal jy ook moet vra:
waarom is daar ook soveel reisrubrieke en –programme? Waarvoor staan “kos” en
“reis” tans?
Is ons dalk so honger (geestelik) dat ons
moet reis (psigies) om nuwe plekke te verken?
Ek is verslaaf aan reis. En kosrubrieke
interesseer my. Dit wil gedoen wees om soos Marlene van Niekerk oor kos te
skryf : rondom ‘n vertelling, legende, fabrikasie, maaksel gee sy vir ons ‘n
resep. Haar boerevertellings in By (Die Burger) is ‘n hoogtepunt van
feestelikheid. Niemand – op sy beurt – kan weer oor eet in ‘n restaurant skryf
soos Kerneels Breytenbach nie.
Die uwe versamel kookboeke. In my vryetyd
probeer ek allerlei resepte uit, hoewel ‘n gebrek aan tyd (en smulpaap-aard) my
eerder lei na ‘n goeie restaurant.
Nou is daar vir ouers ‘n heruitgawe van
Klein kook en geniet: die boek het in
1982 oorspronklik verskyn en beleef sy derde druk! Daar is kleurprente en die
jong kokeling word gevra om saam met Mamma te help om vir die gesin kos te
maak. Hmm, wat van Pappa?
Dis ‘n heerlike boek! Mevrou de Villiers is
Mevrou Kook & Geniet en haar dogter, Eunice, is medeskrywer van hierdie
boek met sy lieflike illustrasies van Marita Johnson.
Dit is by uitstek ‘n kersgeskenk vir
kinders. Of dalk vir iemand wat basiese aanwysings nodig het. Inderdaad is dit
lekker om te eet! Dis inderdaad ‘n mini-kookkursus en ek raai dat dit ook
(onbedoeld) gebruik kan word deur iemand wat dikwels nie die taal van kookboeke
kan dekodeer nie.
[Hierdie resensie word met vriendelike
vergunning van Die Volksblad geplaas.]