Literêre pryse is dikwels omstrede in enige letterkunde. Maar die jongste
bekronings van die UJ-prys laat ‘n mens wonder wátter maatstawe gebruik is om
die wenners aan te wys. My kanttekeninge is nie op die skrywers van toepassing nie,
maar op die beoordelaars wat asseblief moet verduidelik.
Die paneel was:
Karen de Wet (UJ) (Voorsitter)
Frederick Botha (UJ)
Marné Pienaar (UJ)
Ronél Johl (UJ)
Karin Catell (US)
Marius Crous (NMMU)
Alwyn Roux
(UNISA)
Corina van der Spoel (Wits
UP)
Ilse Salzwedel (RSG / Skrywers en boeke)
Die debuutprys vir Roela Hattingh se Kamee bo Lien Botha se Wonderboom?
Soos familie: Stedelike huiswerkers in Suid-Afrikaanse tekste deur Ena Jansen,
die wenner van die UJ-prys, is volgens my ‘n relevante kompendium, maar
dit bekroon bo romans wat volgens my beskeie mening as “kreatief” gedefinieer
kan word, naamlik Brandwaterkom (Alexander Strachan), Vlakwater
(Ingrid Winterbach), o.a.?
In die woorde van die keurders: “Hulle het meegeding teen 50 ander titels
wat voorgelê is – van jeugromans tot literêr-historiese speurtogte (Carel van
der Merwe), Jonker en Brink se gepubliseerde liefdesbriewe, ’n verskeidenheid
speur- en spanningsromans (Deon Meyer, André Krüger, Chris Karsten),
oorlogboeke (Alexander Strachan) en vorige UJ-pryswenners (Willem Anker, Ingrid
Winterbach, André Krüger)”.
Miskien sal ons die voorsitter, Karen de Wet, vra vir ‘n verduideliking?
Watter letterkundige maatstawe is gebruik? Of verstaan ek nie meer die
begrip “kreatief” nie?
In Jansen se eie woorde oor haar studie: “My ideale lesers is mense wat
belangstel in menseverhoudings: in geskiedenis, die letterkunde, sosiologie,
migrante- en stadsgeskiedenis”, wat daarop dui dat sy dit sélf as ‘n akademiese werk sien.
‘n Sosiologiese studie met voetnote, dus.
© Joan Hambidge